تعطيل الوضع الامن "safe mode" فى الويندوز لمزيد من الامان

أول ما تقلبلنا مشكلة فى الويندوز على طول بنفكر نخش على الوضع الامن أو Safe mode واللى من خلاله بنقدر نعمل Troubleshooting للمشكلة يعنى بنعرف المشكلة جاية منين لان الويندوز بيحمل فى الوضع ده اقل اقل المكونات و الوظائف للويندوز.

المشكلة فى الوضع الامن هو مشكلة امنية يعنى النهاردة لو مركب سوفت على الجهاز بيحدد عدد ساعات معينة للاطفال يقدروا فيها يدخلوا على الانترنت ممكن ببساطة يعملوا restart للجهاز و يضغطوا على F8 اثناء الاقلاع ويدخلوا على الوضع الامن ويقدروا يتصفحو النت على طول.........وغيرها من الامثلة الكثيرة.

الحل هنا هو تعطيل الدخول على الوضع الامن وده من خلال التعديل فى محرر الريجيسترى بالذهاب الى المسار التالى:

HKEY_LOCAL_MACHINE\System\CurrentControlSet\Control\SafeBoot

أضغط على علامة + بجانب Safeboot هتلاقى مفتاحين الاولانى اسمه Minimal والتانى Network ببساطة هنعيد تسمية المفتاحين دول باننا نحط فى اخرهم مثلا x عشان نعطلهم


ونعمل restart للجهاز ونضغط f8 ونختار safe mode او Safe mode with networking او Safe Mode with Command Prompt هنلاقى ان الجهاز بيعمل Auto restart وبعدها تظهر شاشة الموت الزرقاء أو Blue screen of death-BSOD


اما لو عاوزين نرجع الوضع الامن تانى ببساطة هنعيد تسمية المفتاحين لـ minimal و network ونعيد تشغيل الجهاز.

فى حل تانى عن طريق اداة صغيرة مجانية يمكن تحميلها من هنـــــا اسمها Enable/Disable SafeMode ودى بتعمل نفس قصة الهاك يتاع الريجيسترى اللى فوق و هى مش محتاجة شرح لتعطيل الوضع نضغط Disablesafemode و لاسترجاعه نضغط Enablesafemode وكمان لو عايزين نحط كلمة سر عشان محدش يلعب فيها.

فى هاك الريجيسترى لو فى حد عارفه ممكن يخش على محرر الريجيسترى ويرجع كل حاجة مكانها عشان كده من الافضل انشاء مستخدم بصلاحيات محدودة Limited User